நீங்கள் தேடியது "நீரிழிவு நோய்"

பிராட்வே:

சென்னை அரசு ஸ்டான்லி ஆஸ்பத்திரியில் நீரிழிவு நோய் மையத்துக்காக அதிநவீன வசதிகளுடன் கூடிய புதிய கட்டிட திறப்பு விழா நேற்று நடைபெற்றது. சுகாதாரத்துறை அமைச்சர் விஜயபாஸ்கர், மீன்வளத்துறை அமைச்சர் ஜெயக்குமார் ஆகியோர் கட்டிடத்தை திறந்து வைத்தனர்.

பின்னர், நீரிழிவு நோயின் ஆபத்தை உணர்த்தும் வகையில் சர்க்கரையில் அக்கரை என்னும் தலைப்பின் கீழ் டாக்டர்கள், மருத்துவ மாணவர்கள், செவிலியர்கள், மருந்தாளுநர்கள் உள்ளிட்டோர் அடங்கிய 20 அணிகள் பங்கேற்ற சமையல் திருவிழா போட்டியும் நடைபெற்றது. இதில் கேழ்வரகு, கோதுமை உள்ளிட்ட தானியங்களால் உருவாக்கப்பட்ட உணவு வகைகள் இடம்பெற்றன.

இதை பார்வையிட்ட அமைச்சர்கள் போட்டியில் வெற்றி பெற்ற முதல் 3 அணியினருக்கு பரிசுகள் வழங்கி பாராட்டினர். நிகழ்ச்சியில், நீரிழிவு நோயால் பாதிக்கப்பட்டவர்களுக்கு சர்க்கரை நோய் விழிப்புணர்வு மேலாண்மை கையேடு மற்றும் குளுக்கோமீட்டர் கருவிகளை அமைச்சர்கள் வழங்கினர்.

நிகழ்ச்சி முடிவடைந்ததும் அமைச்சர் விஜயபாஸ்கர் நிருபர்களிடம் கூறியதாவது:-

நீரிழிவு நோயை முன்கூட்டியே கண்டறியும் வகையில் அனைத்து துறைகள் அடங்கிய புதிய கட்டிடம் ரூ.10 கோடி செலவில் கட்டப்பட்டு திறக்கப்பட்டுள்ளது. நீரிழிவு நோய் குறித்து விழிப்புணர்வு ஏற்படுத்தும் வகையில் ஆஷா எனப்படும் நடமாடும் விழிப்புணர்வு மையம் ஏற்படுத்தப்பட்டு வீடு வீடாகச் சென்று பொதுமக்களுக்கு விழிப்புணர்வு ஏற்படுத்தப்பட்டு வருகிறது.

கஜா புயலால் பாதிக்கப்படும் என கூறப்பட்ட மாவட்டங்களில் உள்ள மருத்துவமனைகளில் 24 மணி நேரமும் டாக்டர்கள் தயார் நிலையில் உள்ளனர். அனைத்து வசதிகளும் செய்யப்பட்டுள்ளது. கடலோர பகுதிகளில் 108 ஆம்புலன்சுகள் அதிக அளவில் உள்ளன.

தமிழகம் முழுவதும் காலியாக இருந்த 770 மருந்தாளுநர் பணியிடங்களுக்கான பணி நியமன ஆணை கடந்த மாதம் வழங்கப்பட்டுள்ளது. மேலும், காலியாக உள்ள 1,884 டாக்டர்கள் பணியிடங்களுக்கு அடுத்த மாதம் (டிசம்பர்) 9-ந்தேதி தேர்வுகள் நடத்தப்பட்டு, அந்த மாத இறுதிக்குள் பணி நியமன ஆணைகள் வழங்கப்படும்.

இவ்வாறு அவர் கூறினார்.

இந்த விழாவில், சர்க்கரை நோயால் பாதிக்கப்பட்ட சென்னையை சேர்ந்த தனியார் கல்லூரி மாணவி சந்தியா பேசுகையில், ‘எனக்கு கடந்த 5 ஆண்டுகளாக சர்க்கரை நோய் பாதிப்புள்ளது. இந்த பாதிப்பு தான் டேக்குவாண்டோ எனும் தற்காப்பு கலை போட்டியில் உலகளவில் நான் வெள்ளி பதக்கம் பெற உதவியாக இருந்தது. அடுத்த போட்டிக்காக நான் ரஷியா செல்ல உள்ளேன். சர்க்கரை நோய்க்கு அரசு ஸ்டான்லி ஆஸ்பத்திரியில் சிறப்பாக சிகிச்சை அளிக்கப்பட்டு வருகிறது’ என்றார்.

இந்த விழாவில், ஸ்டான்லி ஆஸ்பத்திரி டீன் பொன்னம்பல நமச்சிவாயம், நிலைய மருத்துவ அலுவலர் ரமேஷ், மற்றும் நீரிழிவு துறை டாக்டர்கள், கல்லூரி மாணவிகள் உள்பட பலர் கலந்து கொண்டனர்.

பொதுவாகவே பற்களின் மீது அதிக ஆரோக்கியம் எடுத்துக் கொள்ள வேண்டியது அவசியம். ஈறுகளில் உண்டாகும் பாதிப்பு இதயத்தை பாதிக்கும் என ஆய்வுகளில் மூலம் ஆராய்ச்சியாளர்கள் கண்டறிந்துள்ளனர்.

இதுமட்டுமின்றி, வாய் சுகாதாரம் குறைபாடு ஏற்பட்டால் உடலில் எளிதாக பாக்டீரியாக்கள் அதிகம் தேங்கும் அபாயம் உண்டாகும். இதில், சர்க்கரை நோயாளிகள் தங்கள் பற்களின் நலனை பாதுகாக்க எந்தெந்த டிப்ஸ் தெரிந்து வைத்திருக்க வேண்டும் என இனி காணலாம்…

சர்க்கரை நோய் உள்ளவர்களுக்கு பற்களை சுற்றி ஆரோக்கிய சீர்கேடு ஏற்படும் அபாயம் நிறையவே இருக்கிறது.

ஃபங்கல் இன்பெக்ஷன் போன்ற தொற்றுகள் உண்டானால் சர்க்கரை நோய் உள்ளவர்களுக்கு குணமாக நாட்கள் அதிகம் எடுத்துக் கொள்ளும்.

பற்களின் ஆரோக்கியம் சீர்குலைந்து போகாமல் இருக்க, சர்க்கரை நோய் உள்ளவர்கள் இரத்த சர்க்கரை அளவை சீராக வைத்துக் கொள்ள வேண்டியது அவசியம்.

சர்க்கரை நோய் உள்ளவர்கள் ஃப்ளோரைடு டூத்பேஸ்ட் கொண்டு பல் துலக்க வேண்டியது அவசியம்.

பொதுவாகவே நாளுக்கு இரண்டு முறை பல் துலக்குவது ஆரோக்கியத்திற்கு நல்லது. சர்க்கரை நோய் உள்ளவர்களுக்கு இது கட்டாயம் என்கின்றனர் பற்கள் நல மருத்துவ நிபுணர்கள்.

ஒருவேளை பற்கள் அல்லது ஈறுகளில் இருந்து இரத்த கசிவு ஏற்படுவது போல இருந்தால், நேரம் தாழ்த்தாமல் மருத்துவரிடம் பரிசோதனை செய்துக் கொள்ளுங்கள்.

பெரும்பாலான மக்களை பரவலாக அவதிக்குள்ளாக்கும் நோயாக அறியப்படும் சர்க்கரை நோய், இரத்தத்தில் உள்ள சர்க்கரையின் அளவை அசாதாரணமான நிலைக்கு உயரச் செய்யும். வாழ்நாள் முழுவதும் தொடரக்கூடிய இந்நோய் இதர பல உடற்கேடுகளையும் உண்டாக்கக் கூடியதாகும்.

சர்க்கரை நோயை நிவர்த்தி செய்யக்கூடிய ஒரே வழி, சீக்கிரமே இதனை கண்டுபிடித்து, தக்க தடுப்பு முறைகளை மேற்கொள்வது மட்டுமே. அவ்வாறு கண்டுபிடிக்க வேண்டுமெனில், உடல் நிலையில் ஏற்படும் மாற்றங்களை கூர்ந்து கவனித்தல் மிகவும் அவசியம்.

ஏனெனில் இத்தகைய மாற்றங்களே சர்க்கரை நோய்க்கான அறிகுறிகள் ஆகும். இவ்வாறு உடலில் சர்க்கரை நோய்க்கான அறிகுறிகள் ஏதேனும் தென்படுகிறதா என்று கூர்ந்து கவனித்து வருவதன் மூலம் சர்க்கரை நோய் இருப்பதை சீக்கிரமே அறிந்து கொள்ளலாம்.

அவ்வாறு அறிந்து கொண்ட பின், தகுந்த மருத்துவ சிகிச்சை மேற்கொள்வதன் மூலம் இந்நோய் உண்டாக்கக்கூடிய விபரீத விளைவுகளை தவிர்க்கலாம். இப்போது சர்க்கரை நோயின் பல்வேறு அறிகுறிகளைப் பற்றி தெரிந்து கொள்வோமா!!!

* சிறுநீர் கழிக்க வேண்டும் என்பது போன்ற உணர்வு அடிக்கடி உங்களுக்கு ஏற்படுமாயின், உங்களுக்கு சர்க்கரை நோய் இருக்கக்கூடும். சர்க்கரை அளவுகளில் ஏற்படக்கூடிய உயர்வு, இரத்த ஓட்டத்தில் காணப்படும் திரவங்களின் அளவை உயர்த்தக்கூடியதான ஓஸ்மொலாலிட்டியை அதிகரிக்கும். இது சிறுநீரகத்திற்கு அதிக அழுத்தம் கொடுத்து, அதிக அளவிலான சிறுநீரை உருவாக்கும் படி செய்யும். இதனாலேயே சர்க்கரை நோயாளிக்கு அடிக்கடி சிறுநீர் கழிக்க வேண்டும் என்ற எண்ணம் தலை தூக்குகிறது.


* அதிக அளவிலான குளுக்கோஸ், சர்க்கரை நோயாளியின் இரத்தம் மற்றும் திசுக்களில் இருந்து திரவத்தை வெளியேற்றுவதினால், அது அவரின் கண் பார்வையை மங்கச் செய்யும். மேலும் இது கண்களின் கூர்ந்து நோக்கும் திறனை பாதிக்கும். சர்க்கரை வியாதிக்கு சரியான மருத்துவ கவனிப்பு இல்லாமல் போகும் பட்சத்தில், அது கண் பார்வை குறைவை உண்டாக்கும். ஏன் சில சமயங்களில் கண் பார்வையை கூட பறித்து விடும்.

* இது டைப்-1 சர்க்கரை நோயின் மிகப் பொதுவான அறிகுறியாகும். உயிரணுக்களுக்கு தேவையான குளுக்கோஸ் கிடைக்காததனால், உடல் தனக்கு தேவையான சக்தியை கொழுப்பு நிறைந்த திசுக்களை உடைத்து எடுத்துக் கொள்ள தலைப்படும். இதனால் தான் எடை குறைவு ஏற்படுகிறது.

* சர்க்கரை நோயாளியின் உடல், சர்க்கரையை உபயோகித்து தனக்குத் தேவைப்படும் சக்தியைப் பெற்றுக் கொள்ள இயலாது. இதனால், அந்நோயாளி உடற்சோர்வு, அசதி போன்ற தொல்லைகளுக்கு ஆளாக நேரிடும். உயிரணுக்களால், இரத்த ஓட்டத்தில் இருக்கக்கூடிய குளுக்கோஸை, இன்சுலினின் உதவியின்றி உறிஞ்ச இயலாது. அதனால் அவற்றின் ஆற்றல் குறைந்து காணப்படும்.

* இரத்தத்தில் சர்க்கரையின் அளவு அதிகரிப்பதனால், நரம்பு மண்டலம் குறிப்பிடத்தக்க அளவிலான பாதிப்புக்கு ஆளாகும். சர்க்கரை நோய் நீண்ட காலம் வரையில் கண்டுபிடிக்கப்படாமலே இருக்கும் பட்சத்தில், அது கைகளில் அடிக்கடி சிலிர்ப்பது போன்ற உணர்வைக் கொடுக்கும் அல்லது உணர்வுகள் ஏதுமின்றி மரத்துப் போகச் செய்யும்.

நீரிழிவு நோயாளிகளுக்கு புகைப்பழக்கம் உடல்ரீதியாக பல பிரச்சினைகளை ஏற்படுத்தும். புகைபிடிக்காதவர்களை ஒப்பிடும் போது புகைபிடிக்கும் பழக்கம் உள்ளவர்களுக்கு நீரிழிவு நோய் வருவதற்கு 45 சதவீத வாய்ப்புகள் அதிகம். புகைப்பழக்கம் உள்ளவர்களின் வயிற்றில் கொழுப்பு குறிப்பாக ஆண்களுக்கு சேகரமாகும். அதனால் இயற்கையான இன்சுலின் சுரப்பு குறையும். பெண்கள் கர்ப்பக்காலத்திலும், பேறுகாலத்திற்குப் பிறகும் நிகோடின் உடலில் சேர்வதால் பி செல் குறைபாடும் நீரிழிவும் ஏற்படுகிறது.

இந்தியா போன்ற வளரும் நாடுகளில் 50 முதல் 60 சதவீதம் பேர் புகைபிடிப்பதை வழக்கமாக வைத்திருக்கிறார்கள். புகையிலை நிறுவனங்கள் தொடர்ந்து தீவிரமாக விளம்பரங்களை வெளியிடும் வரையில் இந்தியாவில் புகைபிடிப்பவர்கள் குறையப்போவதில்லை. உலகிலேயே இந்தியாதான் புகையிலைப் பொருட்களை தயாரிப்பதிலும் பயன்படுத்துவதிலும் 2-ம் இடத்தில் உள்ளது. 40 சதவீதம் பேர் இந்தியாவில் பீடி புகைக்கிறார்கள். புகைபிடிக்கும் ஒரு நீரிழிவு நோயாளியின் இதயம் மற்றும் தமனியின் ஆரோக்கியம், மற்ற புகைபிடிப்பவரை விட 2 மடங்கு அதிக பாதிப்புக்குள்ளாகிறது. நீரிழிவு பாதிப்புக்குள்ளானவர்கள், நீரிழிவு நோயைத் தடுக்க நினைப்பவர்கள் இருதரப்பினருமே புகைபிடிப்பதை கைவிடவும், குறைக்கவும் முயல வேண்டும். புகை பிடிக்கும் ஒருநபர் தாமாகவே முன்வந்து புகைபிடிப்பதை நிறுத்துவதே முதல் முயற்சியாக இருக்கும்.

நீரிழிவு நோய் சத்தமில்லாமல் கொல்லும் தன்மை கொண்டது. ஏனென்றால் கண்கள், சிறுநீரகம், பாதம், நரம்புகளை அது பாதிக்கும் தன்மை கொண்டது. எதிர்பாராதவிதமாக, பல நீரிழிவு நோயாளிகள், இந்தப் பிரச்சினைகள் அவர்களைத் தாக்க ஆரம்பித்தவுடன்தான் அந்நோயையே கண்டுபிடிக்கிறார்கள்.

நீரிழிவு நோயை மோசமாக மேலாண்மை செய்வதால், எதிர்காலத்தில் சந்திக்கப் போகும் பிரச்சினைகள்:- கட்டுப்படுத்தப்படாத ரத்த சர்க்கரை கண்ணின் உள்படலத்தை, குறிப்பாக விழித்திரையை பாதிக்கும். இந்த நிலைக்கு டயாபடிக் ரெட்டினோபதி என்று பெயர். டயாபடிக் ரெட்டினோபதியின் ஆரம்ப நிலைகளில் எந்த நோய் அறிகுறியும் தெரியாது. உங்களுக்கு நீரிழிவு நோய் இருக்கிறது என்றால், ஆண்டுக்கு ஒரு முறையாவது உங்கள் கண்களை பரிசோதித்துக் கொள்வது அவசியம்.

உடல்உறுப்புகளுக்கு செல்லும் நரம்புகளுக்கு நீரிழிவு நோய் பாதிப்பு ஏற்படுத்துவது “டயாபடிக் நியூரோபதி“. இதன் காரணமாக கை, பாதங்கள் மரத்துப் போதல் அல்லது ஜிவுஜிவு உணர்வு போன்றவை ஏற்படலாம். கால்களில் இருந்து நமக்குத் தெரியாமலேயே செருப்பு நழுவிப் போதல் அல்லது பாலுணர்வு படிப்படியாக குறைதல் போன்றவை இதன் பொதுவான அறிகுறிகளாகும். மோசமான நியூரோபதி, பாதங்களுக்கு ரத்தவோட்டத்தை குறைத்து, உயிருக்கு உலை வைக்கும்.

அப்பாவுக்கோ, அம்மாவுக்கோ சர்க்கரை நோய் பாதிப்பு இருந்தால் கண்டிப்பாக அவர் வாரிசு தனக்கு அந்த பாதிப்பு ஏற்பட்டுள்ளதா என்பதனை அடிக்கடி பரிசோதித்துக் கொள்ள வேண்டும். அப்பாவுக்கும், அம்மாவுக்கும் இருவருக்கும் பாதிப்பு இருந்தால் வாரிசுகளுக்குக் கூடுதல் கவனம் தேவை. இதனை அனைத்து மருத்துவர்களும் அதிகம் வலியுறுத்தி வருகின்றனர். இதனால் சமுதாயமும் நன்கு கவனத்துடன் இருக்கின்றனர்.

பொதுவில் இன்றைய கால கட்டத்தில் பலரும் சர்க்கரை நோய் பாதிப்பிற்குள்ளாவதால் இளைஞர்களும் அவ்வப்போது சர்க்கரை நோய் பரிசோதனை செய்து கொள்ளுங்கள் என மருத்துவர்கள் அறிவுறுத்துகின்றனர். அநேக இளைஞர்களுக்கு சர்க்கரையின் அளவு சற்று கூடுதலாகவே இருக்கின்றது. சிலருக்கு ஒரு நேரம் அளவாகவும், ஒரு நேரம் கூடுதலாகவும் இருக்கின்றது. உடற்பயிற்சி மட்டுமே உதவாது. நாம் உண்ணும் உணவினை முறையாக வைத்துக் கொண்டால் மட்டுமே நமது கணையத்தில் உள்ள செல்களுக்கு சிறிது ஓய்வு கிடைத்து தன்னை சரி செய்து கொள்ளும்.

உங்கள் சர்க்கரை அளவினை கட்டுப்பாட்டில் கொண்டு வர பழகி விட்டீர்கள் என்றால் இதுவே உங்கள் அன்றாட பழக்கமாகி விடும். சிலர் சாப்பிட்ட ஒரு மணி நேரத்தில் மிக அதிகமாக இருக்கின்றது என்பர். சர்க்கரை, மாவு சத்து இவை உடனடி ரத்தத்தில் சர்க்கரை அளவினை சர்க்கரை பாதிப்பு உள்ளவர்களுக்கு ஏற்றி விடும். சிலருக்கு காலை வெறும் வயிற்றில் சர்க்கரை அளவு சற்று கூடுதலாக இருக்கின்றது என்று கூறுவர்.

இவர்கள் முறையாக மருந்தும் உணவும் எடுத்துக் கொண்டாலும் காலை வெறும் வயிற்றில் சர்க்கரை அளவு கூடுகின்றது என்பர். இது ஹார்மோன்களின் செயல்பாடு இரவில் அதிகமாக இருப்பதனால் இருக்கலாம். பகல் நேரத்தில் 120-140 அளவில் உங்கள் சர்க்கரை அளவு இருக்கின்றதா என்பதைப் பாருங்கள். காலை உயர் சர்க்கரை அளவினைப் பற்றி மருத்துவ ஆலோசனையும் பெறுங்கள்.

உங்கள் சர்க்கரை அளவின் ஏற்றத்திற்கு உங்களின் மற்ற மருந்துகளும் ஒரு காரணமாக இருக்கலாம். நீங்கள் எடுத்துக் கொள்ளும் மருந்துகளை (சித்தா, ஆயுர்வேதா, ஹோமியோபதி உட்பட) உங்கள் மருத்துவரிடம் மறைக்காமல் சொல்லுங்கள்.

பொதுவில் கார்போ ஹைடிரேட் உணவுகள் 30-60 நிமிடத்தில் அதிக உயர்வினைக் காட்டும். புரத, கொழுப்புகள் இரண்டு மணி நேரம் பொறுத்து உடைய ஆரம்பிக்கும். ஸ்ட்ரெஸ், மனஉளைச்சல் இவை சர்க்கரை அளவினைக் கூட்டும்.

கேபின் கூட சர்க்கரை அளவினை கூட்டிக் காட்டும். சூடான தட்பவெப்பம் இருக்கும் பொழுது உடலில் நீர் சத்து குறைந்து சர்க்கரை அளவு மாறுபடலாம். ஆக அவ்வப்போது  சிறிது நீர் குடித்துக் கொண்டு இருப்பதே மிகவும் நல்லது.

வயது கூடும் பொழுது ஹார்மோன் மாறுபாடுகள் ஏற்படுகின்றன. மேலும் நாம் ஒரே வகையான உணவு முறையினையே பழக்கப்படுத்திக் கொள்கின்றோம். காய்கறி, பழங்கள் இவற்றினை அதிகம் உணவில் சேர்த்துக் கொள்ள பழக வேண்டும். உங்கள் பரம்பரை காரணமாக வயது கூடும் பொழுது இன்சுலின் உருவாக்கம் குறையலாம்.

எனவே பாதுகாப்பு முறையாக மருத்துவ அறிவுரைபடியான உணவுப் பழக்கம், உடற்பயிற்சி, யோகா இவற்றினை அனைவருமே பழக்கப்படுத்தி கொள்ள வேண்டும்.

சிறு சிறு அளவாக 6-7 முறை உணவினை எடுத்துக் கொள்வதும் ரத்தத்தில் சர்க்கரை அளவு கூடாதிருக்கச் செய்யும். பலருக்கும் வீட்டிலேயே சர்க்கரை பரிசோதனை செய்து கொள்ளும் வசதி இப்பொழுது உள்ளது. ஆனால் இதனை முறைப்படி கற்றுக் கொள்ளுங்கள்.

“சர்க்கரை நோயாளிகளுக்கு முதலில் பாதிக்கப்படுவது கால்கள். ‘உச்சி முதல் உள்ளங்கால் வரை பரிசோதிக்க வேண்டும்’ என்று பொதுவாக மருத்துவத்தில் சொல்வார்கள்.

* சர்க்கரை நோயால் பாதிக்கப்பட்டு, சிகிச்சை எடுத்துக்கொள்ளாமல் இருப்பவர்களுக்கு பாதத்தில் உணர்ச்சிகள் குறைந்துவிடும், நோய் எதிர்ப்புச் சக்தி மிகவும் குறைந்துவிடும். நரம்புகள் பாதிப்படையும். பாதத்தைப் பொறுத்தவரை எலும்புப் பகுதியில் பாதிப்பு, காலில் சுளுக்கு போன்ற பிரச்சனைகள் ஏற்பட்டாலும், வீக்கம் இருக்கும்; வலி தெரியாது, உணர்ச்சி இருக்காது. பாதிப்புகள் எதுவும் தெரியாத நிலையில், அப்பகுதியில் மீண்டும் மீண்டும் அசைவு கொடுப்பதால் அழுத்தம் ஏற்பட்டு புண் பெரிதாகும்.

* காலில் புண் ஏற்படும்போது முதலில் பாதிப்படைவது கால் நரம்புகளே. காலப்போக்கில் பாதிப்படைந்த பகுதியில் அழற்சி ஏற்படும். அதைக் கவனிக்காமல் விடுவதால் நரம்பில் பாதிப்புகள் தீவிரமடைந்து தசைகளின் செயல்பாடுகள் தடைபடும். காலை ஊன்றமுடியாமல் அவதிப்பட நேரிடும்.

* கால் ஆணி, பாத வெடிப்பு, தடிப்புகள் போன்ற பிரச்சனை உள்ளவர்கள் மருத்துவரை உடனடியாக அணுக வேண்டும். குறிப்பாக இத்தகைய பாதிப்பு உள்ளவர்கள் தினமும் கால்களைப் பராமரிக்க வேண்டும். சர்க்கரை நோயாளிகள், தங்களின் தோல், பாதம், ஊட்டச்சத்து, எலும்பு ஆகியவற்றுக்கு முக்கியத்துவம் தரவேண்டும்.



கால்களை எப்படிப் பராமரிப்பது?

* சர்க்கரையின் அளவை அடிக்கடி பரிசோதிக்க வேண்டும். மருத்துவரின் ஆலோசனைப்படி உணவு உட்கொள்ள வேண்டும். தினமும் தூங்கச் செல்வதற்குமுன் சூடான நீரைக் கொண்டு கால்களைக் கழுவ வேண்டும். காலில் உணர்ச்சி இருக்கிறதா? என்பதை தினமும் உறுதி செய்துகொள்ள வேண்டியது அவசியம்.

* கால் கழுவும்போது, காலில் அடிபட்டிருக்கிறதா? புண், காயங்கள், சிராய்ப்புகள் காணப்படுகிறதா? தடித்திருக்கிறதா? என்பதை உன்னிப்பாக கவனிக்க வேண்டும்.

* கால் வறண்டு போகாமல் பார்த்துக்கொள்ள வேண்டும். வறண்டு போகும்பட்சத்தில், மருத்துவர் ஆலோசனையுடன் லோஷன், க்ரீம் பயன்படுத்துவது நல்லது.

* கால் விரலின் நகங்களை தினமும் சுத்தப்படுத்த வேண்டும். நகம் வளராமல் பார்த்துக்கொள்ள வேண்டியது அவசியம். நகம் வெட்டும்போது, மிகவும் கவனமாக வெட்ட வேண்டும். சதையை வெட்டிவிட்டால், அது புண்ணாகி பிரச்னை ஏற்படுத்தும்.

* கால் நகங்களைப் பாதுகாக்க, லெதரால் செய்யப்பட்ட ஷூ-ஷாக்ஸ் போன்ற காலணிகளை அணிவது நல்லது. காலின் அளவுக்குப் பொருத்தமான காலணிகளைத் தேர்வுசெய்ய வேண்டும்.

* காலில் ரத்த ஓட்டம் சீராக இருக்க வேண்டியது அவசியம். உட்காரும்போது கால்களை நீட்டி உட்கார்வது, காலுக்கான தனிப்பயிற்சிகள் செய்வது அவசியம்.

இப்பொழுது வெயில் காலம் ஏற்பட்டுவிட்டது. இதில் அதிக வியர்வை வெளியேறும் பொழுது உடலில் நீர்சத்து குறையலாம். இதனால் ரத்தத்தில் சர்க்கரை அளவு கூடிவிடும். இதனால் அடிக்கடி சிறுநீர் செல்ல நேரிடும் இது மேலும் நீரின் அளவினை உடலில் குறைக்கும்.

அதிக சூடு இல்லாமல் இருக்க உங்களை வீட்டுக்குள்ளேயே அடையச் செய்யக்கூடாது. காலை, மாலைகளில் வெளியே வாருங்கள். நடை பயிற்சி செய்யுங்கள். இன்சுலின், மருந்து இவை அதிக உஷ்ணம், உரையும் குளிர் இரண்டிலும் பாதிக்கப்படும் வாய்ப்பு உண்டு என்பதை அறியுங்கள். ஆகவே மருந்துகளை பாதுகாப்பாக வையுங்கள்.

* நன்கு தண்ணீர் குடியுங்கள். கை அருகிலேயே தண்ணீர் பாட்டில் இருக்கட்டும். அடிக்கடி சிறிது நீர் குடியுங்கள்.

* வெயில் காலம் என்பதால் உங்கள் சர்க்கரை அளவினை வீட்டிலேயே அடிக்கடி பரிசோதித்துக் கொள்ளுங்கள். அதன்படி இன்சுலின் உபயோகப்படுத்துங்கள். (இன்சுலின் உபயோகிப்பவர்களுக்கு மட்டும்)

* மருந்து கைவசம் கை பையில் இருக்கட்டும்.
* சிறிய உணவு கைவசம் இருக்கட்டும்.
* தலை தொப்பி, கறுப்பு கண்ணாடி இவை வெளியில் செல்லும்பொழுது அவசியம் அணியுங்கள்.
* வெயில் உங்கள் சருமத்தினை எரிக்காத வகையில் தகுந்த பருத்தி ஆடைகளை உடலை மூடி அணிந்து கொள்ளுங்கள்.

அவ்வளவு தான். கோடையில் சர்க்கரை நோய் பாதிப்பு உடையவர்கள் இந்த பாதுகாப்பு முறைகளை மேற்கொண்டால் கோடையும் வசந்தம் தான்.
மூட்டு வலி என்பது நம் வீட்டில் பலரிடம் நாம் கேட்கும் மிக சாதாரண வார்த்தை ஆகிவிட்டது. ஆர்த்லைட்டிஸ் என்ற இந்த வார்த்தைக்கு கீழ் 100 வகை பிரிவுகள் இருக்கின்றன.

இந்த மூட்டு வலிக்கு கிருமி தாக்குதல், புகை பிடித்தல், முன்பு ஏற்பட்ட அடி, பரம்பரை உடலில் அதிக எடை என பல காரணங்கள் இருக்கக் கூடும். பல காரணங்களின் சேர்க்கையாகவும் இருக்கக் கூடும்.

ஆனால் நமது வாழ்க்கை முறை மூட்டுவலி தவிர்க்கப்பட உதவும், பாதிப்பு  ஏற்பட்டால் மறு வாழ்க்கை முறைதான் கூடவோ, குறையவோ காரணமாக அமையும்.

மூட்டு வலி எனும் பொழுது வலி வீக்கம், மூட்டுக்களை அசைப்பதில் கடினம் என இருக்கும். ஆக வரும் முன் காப்பதே எதிலும் சிறந்த பாதுகாப்பாக அமையும்.

* உடற்பயிற்சி: இன்னமும் இதனை கடை பிடிக்காத மக்கள் கோடானு கோடி உள்ளனர். உடற்பயிற்சி உடல் நலன், மன நலனைக்காக்கும். என்பதோடு மூட்டு பாதுகாப்பிற்காக  ஆலோசனை பெற்று செய்யும் பயிற்சிகள் வெகுவான பலனை அளிக்கின்றது என ஆய்வுகள் உறுதி செய்கின்றன.

* மருத்துவர்களை தவிர்த்தல்: பலர் மருத்துவர்களை சந்திப்பது என்றாலே அஞ்சுவர். கையில் கிடைக்கும் மாத்திரையினை எடுத்துக் கொண்டு பிரச்சினைகளை பெரிதாக்கிக் கொள்வர்.

கோடை காலத்தில் கடற்கரை பகுதிக்கு அருகில் இருப்பவர்களுக்கு வெயிலும், பிசுபிசு வென்ற உணர்வும் வியர்வையும், காற்றின் ஈரப்பதத்தில் மாறுதலும் இருப்பதால் மூட்டு வலி பாதிப்புடையவர்கள் தனக்கு  பாதிப்பு கூடுதலாக இருக்கிறதென்றே சொல்வார்கள். பொதுவில் மிதான உஷ்ணம் மூட்டு வலி பாதிப்பு உடையவர்களுக்கு குறைந்த வலியினையே கொடுக்கும்.

என்றாலும் மேற் கூறப்பட்டுள்ள காரணங்களால் இவர்கள் வலி கூடுவது போல் உணரலாம். அதிக வெய்யில் நேரத்தில் வீட்டுக்குள் இருத்தலும் காலை, மாலை நேர உடற் பயிற்சி, தேவையான அளவு நீர் குடித்தல், மருத்துவர் அளித்த மருந்து இவை மூட்டுவலி குறைய கண்டிப்பாய் உதவும்.

நீரிழிவு நோயை கட்டுக்குள் வைக்கலாம்; முற்றிலும் குணப்படுத்த முடியாது. நீரிழிவு நோயாளியின் வயது, உயரம், எடை, ஆண், பெண் உடலுழைப்பின் தன்மை ஆகியவற்றை கணக்கில் கொண்டே, அவரது உணவு முறையை தீர்மானிக்க வேண்டும்.

ஒருவரது உடல் எடைக்கேற்ப, 1 கிலோவுக்கு 1 கிராம் என்ற அளவில் தினமும் ஒரு வளர்ந்த மனிதனுக்கு, புரதம் தேவைப்படுகிறது. உடலில் ஏதேனும் நோய், குறைபாடு இருப்பின், இந்த அளவில் மாறுதல் தேவைப்படலாம்.

கொழுப்பு சத்தில் இருந்து பெறப்படும் கலோரி, மொத்தமாக தேவைப்படும் கலோரியில் 30 சதவீதம் தாண்டக்கூடாது. அதிலும், நெய், வெண்ணெய், தேங்காய் எண்ணெய், வனஸ்பதி ஆகியவற்றில் இருந்து 10 சதவீதம் ஆலிவ் எண்ணெய், நிலக்கடலை எண்ணெய் ஆகியவற்றில் இருந்து 10 சதவீதம் சூரியகாந்தி எண்ணெய், கார்ன் எண்ணெய், தவிட்டு எண்ணெய், கடுகு எண்ணெய், நல்லெண்ணெய் ஆகியவற்றில் இருந்து 10 சதவீதம் என பிரித்து எடுத்துக் கொள்ளப்பட வேண்டும் என்பர்.

மேற்கண்டது போக மீதி கலோரிகள் கார்போ ஹைட்ரேட் உணவில் இருந்து பெறலாம். எளியவகை சர்க்கரை, கரும்பு சர்க்கரை போன்றவை சுலபமாக செரிமானம் ஆகி, மோனோ சேக்கரைட்களாக மாறி, விரைவாக உறிஞ்சப்பட்டு, ரத்தத்தில் சர்க்கரை அளவை பெருமளவில் கூட்டுகின்றன. ஆகவே அவற்றை தவிர்த்து காம்ப்ளக்ஸ் கார்போ ஹைட்ரேட்டுகளை எடுத்து கொண்டால் செரிமானம் ஆவதும், ரத்தத்தில் சர்க்கரை உறிஞ்சப்படுவதும் தாமதம் ஆகும். உடல் தன்னை தயார்படுத்தி கொள்ள தேவையான நேரமும் கிடைக்கும்.

எல்லா மனிதருக்கும் போலவே, நீரிழிவு நோயாளிகளுக்கும் பிற தாது உப்புக்கள், வைட்டமின்கள் ஆகியன தேவை. உணவு மூலம் கிடைப்பதில் பற்றாக்குறை நேர்ந்தால் மாத்திரை வடிவில் எடுக்கலாம்.

ஓர் உணவு எவ்வளவு வேகமாக, மெதுவாக செரிமானம் ஆகிறது. உறிஞ்சப்படுகிறது என்பதை பொறுத்து கிளைசமிக் இன்டெக்ஸ் அமைகிறது. எடுத்துக்காட்டாக முழு தானியங்கள் குறைந்த அளவு கிளைசமிக் இன்டெக்ஸ் உடையனவாக இருக்கின்றன. செரிமானம் ஆவதும், உறிஞ்சப்படுவதும் தாமதமாகும் காரணத்தால் நீரிழிவு நோயாளியின் இன்சுலின் குறைவாகவும், மெதுவாகவும் இருப்பதால் மேற்சொன்னது போன்ற உணவுகள் அவர்களுக்கு மிகவும் பொருத்தமானவை ஆகும்.

தேவையான அளவு நார்ச்சத்துள்ள உணவுகளை, நீரிழிவு நோயாளிகள் எடுத்துக் கொள்ளும்போது,  

* இன்சுலின் எடுக்கும் அளவு குறையும்
* கொலஸ்ட்ரால், டிரைகிளிசரைட்ஸ் அளவு (ரத்தத்தில்) குறையும்.
* உடல் எடை குறைவது சுலபமாகும்.
* ரத்த அழுத்தம் சீராகும்.

நார்ச்சத்துக்கள் கரையக்கூடியவை, கரைய முடியாதவை என இருவகையாக உள்ளன. வெந்தயம் போன்ற கரையக்கூடிய நார்ச்சத்துக்களால் குடலில் சத்துக்கள் தக்க வைக்கப்படுகின்றன. குளுக்கோஸ் உறிஞ்சப்படுவது தடுக்கப்படுகிறது. ரத்தத்தில் கொலஸ்டிரால் அளவை குறைக்கிறது.

கரைய முடியாத நார்ச்சத்துக்களான செல்லுலோஸ், லிக்னைன் ஆகியன பழங்கள், காய்கறிகள், மற்றும் தானியங்கள், பருப்பு வகைகளில் உள்ளன. அவற்றை உண்ணும்போது, விரைவில் திருப்தியான உணர்வு தோன்றும். குடலில் உணவு தங்கும் நேரம் அதிகமாகும். மலச்சிக்கல் தடுக்கப்படும். குளுக்கோஸ் உறிஞ்சுவது தாமதம் ஆகும். தினமும் 40 கிராம் அளவுக்கு நார்ச்சத்துக்கள் நீரிழிவு நோய். உடையவர்களுக்கு தேவைப்படுகிறது.

நீரிழிவு நோய் உடையவர்களின் உடலால் அதிகப்படியான கலோரிகளை சேமிக்க இயலாது. தினசரி தேவையான அளவு கலோரிகளை குறிப்பிட்ட இடைவெளியில் சிறிய உணவுமுறையாக எடுத்துக் கொள்வது நல்லது.

விருந்து, உபவாசம் இரண்டுமே தவிர்க்கப்பட வேண்டும். ஏனெனில் இரண்டு முறையிலும் ரத்தத்தில் சர்க்கரை அளவு அதிகரித்து விடும். வெறும் திரவ உணவு எடுத்துக் கொள்வதும் கூடாது.

கொழுப்பு சத்து குறைந்த காம்ப்ளக்ஸ் கார்போஹைட்ரேட் மிகுந்த உணவுகளை எடுத்துக் கொள்வது நன்மை தரும். நமது பாரம்பரிய உணவுகளிலேயே சிறு, சிறு மாற்றங்கள் மூலம் நீரிழிவு நோய்க்குத்தக்கபடி மாற்றி அமைக்கலாம்.